الرك علي الأصل
الرك علي تربيتك
ولا هيفرق فلوس
ولا علام وشهادات
ولا جاه
ولا هيفرق إنت إبن مين أو عملت إيه
الرك علي معدنك،
وإنك تتعلم الأصول إلي ليك وإلي عليك.
_وأولهم أصول تعامل الأب مع أبناءه:
إنه ما يحرجش أولاده ولا يغلط فيهم قصاد حد، وإن مش كل حاجة يعملوها يكون لازم بمقابل كدا هيتعلموا الجشع، ومش كل حاجة يطلبوها تجي كدة هيتعلموا الأنانية، ويساوي بين الاخوات في حالة الرفض علي أي شئ يكون في إقناع بأسباب الرفض، وإفتكر دايما في الف حل بديل عن الضرب.
_وثانياً أصول تعامل الست مع جوزها: إنه اول ما يرجع من برة، تقبله بابتسامة خفيفة، تهون عليه ضغط اليوم، ماتطلبش طلبات أول ما يوصل، تراعي نضافة البيت، وتحترم غيرته وكلامه، ودايما تصونه في فلوسه وعرضه وعياله،
ماتحطش نفسها في مقارنة مع أهله، وتعامل أهله بالمعروف كما تحب أن يعمل أهلها، وصورته قدام أهلها دايماً تطلع كويسة، وأوعي تنسي تقولي حاضر لأنها بتمنع مشاكل كتير وتكوني ليه الأمان في وقت الخوف وسند في وقت الشدة والطمأنينة في القلق وتسعده في كل اللي جي من عمره..
_وثالثاً أصول تعامل الرجل مع زوجته: إنك ما تقللش من حاجة جيباها في الجهاز، وإنك تخصص ليها مصروف خارج متطلبات البيت خاص بيها هي، وإنك تحافظ علي سرها وتعمل ليها خصوصية في شقتها ولازم تكون فاهم إن مفيش حد ليه حكم عليها غيرك، ومتحرمهاش من أهله وسيرتهم دايما تيجي بالخير، تشورها في قرارتك وتحترم تفكيرها ولازم تكبر شأنها، وعشان كدة ما أكرمهن إلا كريم..
_رابعاً: أصول حق نفسك عليك
إرتقي بنفسك، يعني مايشغلكش حد ، عزز كيانك، وإوعي تطلب الاهتمام من حد، إرمي ورا ضهرك، واتاكد دايما إن كل حاجة بتعدي، وإن اللامبالاة فن..
_وأخيراً:
وسط الكركبة والناس اللي كلامهم سلبي في حياتك وأنصاف البني أدمين اللي بنتعامل معاهم أغلب الوقت عمرك ما هتعرف قيمة الأصول إلي نشأت عليها غير لما تشوف ندالة قليل الأصل، ساعتها هتستوعب إن تعب أهلك فيك ماكانش علي الفاضي، وهتحمد ربنا علي نعمة التربية وإن فعلاً وحقيقي الرك علي الأصل.
