الأمهات الأعزاء.. إية الأمنية اللي محققتهاش السنادي ونفسك تحققيها 2024؟، بهذه الكلمات وجهت عبير أحمد، مؤسس إتحاد أمهات مصر للنهوض بالتعليم، وإئتلاف أولياء الأمور، حديثها لأولياء الأمور في رأس السنة.
وتفاعل عشرات أولياء الأمور من الأمهات علي صفحة الإتحاد والإئتلاف، في الفيسبوك، حيث قالت ولي أمر: “أتمنى ربنا يكون مع أولادي وتمر السنة بسلام وأتمنى أكتر إن امتحانات الثانوية العامة السنة دي تكون اخف وارحم من السنين اللي فاتت رحمة بقلوبنا ونفسية أولادنا جميعا، وآخر شئ إن ربنا يشفي كل مريض ويعافي الجميع ويمتعهم بالصحة والعافية يارب العالمين”.
وأضافت ولي أمر: “نفسى ربنا ينجح بناتى ويديم عليهم الصحة وراحة البال ويحققوا كل اللى نفسهم فيه، وإن شاء الله الامتحانات تكون متيسرة ووقتها كافى وميبقاش فى ضغوط عليهم وينجح كل طلاب الثانوية العامة ويجبر بخاطرهم إن شاء الله”.
وتابعت ولي أمر: “نفسي ابنى ينجح فى ثالته اعدادى إن شاء الله لأن المنهج كبير ومحتاج تركيز جامد وكمان البوكليت جديد عليهم السنادى”، واستكملت أخري: “نفسي السنه دي إن شاء الله ابني ينجح في الثانوية العامة
وتكون الامتحانات سهله أو صعبه للمذاكر، المهم من المنهج، والوزير يزود مدة الامتحان مينفعشي خالص ٣ ساعات دي، يا رب ينجح هو وكل اللي زيه ويفرحوا قلوب امهاتهم لإننا نستحمل أي حاجه ونشوف ولادنا وصلوا لبر الأمان وربنا يعينهم ويحفظهم”.
وقالت ولي أمر: “نفسي المدارس مستواها يرجع زى الأول والطالب يحب المدرسة والحضور ويكون فى أنشطة تنمى مهارات الطالب”، وذكرت ولي أمر أخري: “نفسي ابني يجيب المجموع اللي بيتمناه ويدخل الكلية اللي نفسه فيها، ربنا يوفقه هو وكل طلاب الثانوية العامة ويحققوا اللي بيتمنوا”.
