الفنانة إيمان أيوب لـ«نتعلم مصري»: «لازم نبطل حافظ مش فاهم.. والمدارس تكون عملية»

الإهتمام بالفن والثقافة والمسرح ينعكس علي تربية وتهذيب الطلاب واكتشاف المواهب

وجهت الفنانة إيمان أيوب رسالة إلي أولياء الأمور خاصة الأمهات، قائله: “أهم حاجه انك تصاحب إبنك أو بنتك وإنك تسمعلهم، وكمان مهم جدا التواصل مع المعلمين بشكل دائم ومتابعة أخلاقيات وسلوك الطلبة المحيطين بالابن”.

واضافت أيوب، في تصريحات خاصة لموقع “نتعلم مصري”: “ولازم التعليم يكون إلى جانب النظري عملي علي أرض الواقع، وفتح باب للمخترعين من الطلبة في مصر ليثبتوا وجودهم وأن يتم عمل مسابقات بشكل شهري للمخترعين والمتفوقين”.

وواصلت: “وأن تعود الملاعب للمدارس واكتشاف مواهب الطلبة وأن تعود حصه التدبير المنزلي والموسيقي والكروشيه والتريكو وتنميه مهارات جديدة، بالإضافة للمهارات التكنولوجية”، وكذلك إقامة معارض لهم لبيع منتجاتهم واكتشاف مواهبهم وقدراتهم للتواصل مع الجامعات التي يحبون الإنتماء إليها.

واستكملت إيمان: “مهم جدا نرجع اكتشاف مواهب الطلبة والطالبات”، مستطرده: “لو لقيت طالب مثلا بيزرع كويس وبيفهم في الزراعة، لازم أنمي موهبته واخليه يتواصل بكلية الزراعة بحيث المتفوقين ندمج لهم سنتين في سنة مثلا، ويبقي الشغل عملي أكثر ما هو نظري، العيال مش لازم تحفظ طول الوقت، بيتكلموا عن التاريخ يروحوا الهرم، بيتكلموا عن الأماكن التاريخية يروحوا الأماكن دي نفسها، بيتكلموا عن الأدب والفنون يروحوا المتاحف والمسارح وهكذا، لازم نبطل حافظ مش فاهم، لازم تكون المدارس عملية علشان الطالب لما بيدخل الجامعة بيصطدم بإن أغلب الدراسة عملية أكثر من النظري”.

وشددت أيوب علي ضرورة الإهتمام بالفن والثقافة والمسرح لما ينعكس علي تربية وتهذيب الإنسان، فيما أشادت بنظام مدارس التكنولوجيا التطبيقية.