رئيس جامعة حلوان: «مفيش طالب هيتخرج إلا بإجادة لغة أجنبية تحدثا وكتابة بداية من العام المقبل»

كشف رئيس جامعة حلوان الدكتور السيد قنديل، إن مجلس الجامعة اتخذ قرار ويتم وضع الأطر التنفيذية له، موضحا أن القرار ينص علي إن الطالب لا يتخرج إلا بإجادة كاملة للغة من اللغات الأجنبية تحدثا وكتابة، بجميع الكليات بداية من العام المقبل.

وأضاف رئيس جامعة حلوان، خلال تصريحات صحفية علي هامش افتتاح نادي جامعة حلوان، أن الجامعة لديها مركز لغات بمقر الجامعة القديم بشارع أحمد عرابي، به ٤ أدوار ومساحة الدور الواحد تبلغ ١٦٠٠ متر، وعقدنا بروتوكول مع معهد لغات القوات المسلحة وشراكات وسنحصل علي اعتماد شهادات من المراكز الثقافية المختلفة سواء للغات الإنجليزي والألماني والفرنساوي والخ، ومعهد لغات القوات المسلحة يدرس ١٨ لغة وهذا يوفر 30% بالتوظيف مع الإلمام الكامل بالاجادة بتكنولوجيا المعلومات.

قنديل: 70% من التخصصات أصبحت غير مطلوبة بالقدر الكافي لسوق العمل.. ومازال فكرة الكتاب الجامعي مسيطرة

وأشار رئيس جامعة حلوان إلي أن هناك ٧٠% تقريبا من التخصصات الجامعية أصبحت غير مطلوبة بالقدر الكافي لسوق العمل، مستطردا: “الحقوق هل محتاج كل هذا العدد، لأ، الخدمة الاجتماعية، لأ، والرئيس السيسي قال ذلك، وكذلك الآداب والتربية والتجارة”.

الطالب في التعليم قبل الجامعي مفيش أمامه غير تراك واحد إنه يحفظ معاني ويدخل يحطها في الامتحان

ولفت رئيس جامعة حلوان النظر إلي أن “الأنشطة في التعليم قبل الجامعي قلت جدا، الطالب مفيش أمامه غير تراك واحد إنه يحفظ معاني ويدخل يحطها في الامتحان ومش بيشتغل زراعة زي زمان في المدرسة ولا تدبير منزلي زي زمان ولا موسيقي ولا تربية رياضية زي زمان ولا رسم، في نسبة ولكن مش بالقدر الكافي زي زمان، فتلاقي الطالب كان بيكتشف في نفسه إنه بيحب الشعر وبيعرف يصنع، والخ”.

وتابع: “أنا كدولة بيطلع من عندي ٦٥٠ ألف طالب سنويا عايزين كلهم يدخلوا جامعات، بنعمل التعليم الفني والجامعات التكنولوجية ومازال إلى الآن الناس بردوا مش مقبله اوي وهذه مشكلة ثقافة وانفصال عن الصناعة، روح لرجال الأعمال وتعالي صمم البرامج معايا طب خد الطالب يتدرب عندك واديله مصروفاته ويتم تأهليه معايا وعلمه، منها وفرت عماله لمدة ٤ سنين بسعر زهيد وفي نفس الوقت انت علمته زي ما انت عايز مش تنتظر لغاية ما يتخرج، كل ذلك بنطبقه الآن وهذه معادلة صعبة وليست سهله”.

وواصل: “أصعب حاجة علي البني آدم الفراغ، بيخليه يدور علي حاجات غريبة جدا، انت خلي الطالب مشغول، تعليم لوحده مش كفاية، تعليم مع تدريب عديت مرحلة مهمة، لازم تطوير التعليم بالشكل اللي انت عاوزه، بالشكل اللي البلد عايزاه، لازم تطوير الأستاذ وتطوير المنشأة، كلها منظومة مربوطة ببعضها، وعلشان أقدم جودة تعليم لازم جودة أستاذ وجودة منشأة”.

وأكد رئيس جامعة حلوان: “وعلشان الكلام دا يحصل، عندما مشكلة في التربية والتعليم، التعليم الأساسي أهم مرحلة، من أولي ابتدائي لغاية ٦، لازم اهتم بالأستاذ ومدير المدرسة والمادة التعليمية اللي بياخدها، مرحلة تأسيس محو أمية واكتساب معارف، الإعدادية مرحلة تصنيف، اما المرحلة الحقيقية اللي بنتأخر فيها مرحلة الثانوية العامة بداية التوظيف، يعني الولد اللي بيحصل كويس وكانت زمان بتترجم لدرجات، بداية التأهيل من أولي ثانوي، في طلبة كتير في ثالثة ثانوي بتكون مش عارفه هتروح فين ومش عارف يحدد وهذا سن متأخر جدا، لازم يكون محدد من بدري وعارف”.

وتابع: “احنا كمجلس جامعة في حلوان، مهمتي جودة خريج يعني سوق العمل قبله وله مكان ولا لا وهذه مهمتي الأساسية كجامعة، مهمتي أوفر اللي محتاجاه البلد من عماله مدربه ومؤهله بشكل أكاديمي”.

“مفيش طالب يتخرج إلا بإجادة لغة، انا بوفرله ده، هتساعد في اقتصاد الدولة وهتسفر طلبة للخارج والقرار لمصلحة الطالب، بعد تعليم اللغة قدرات الطالب الشخصية ستكون لها شكل آخر متميز”، يضيف رئيس جامعة حلوان أنه لابد أن أقدم البرهان لكي أحصل علي دعم الدولة، من خلال زيادة عدد التوظيف واقبال علي طالب الجامعة وقبوله في سوق العمل نسبة البطالة للخريجين تقل، وهذا هو المؤشر والمقياس.

واستكمل: “في معضلة كبيرة في الموضوع ده وهي جودة العملية التعليمية، مازال فكرة الكتاب الجامعي مسيطرة، طب ازاي بنقول التعليم ومادة موجهه ومؤلف شخصي الطالب يمتحن فيه، طب هل احنا في عصر المعلومات بقت الفكرة دي موجودة؟ لأ طبعا، احنا شغالين علي إن يبقي مؤلف جماعي ولينكات يدخل عليها الطالب لتحصيل المادة ومجموعة مراجع يستشهد بها وبنوك أسئلة وتواصل مع هيئة التدريس وميبقاش في كتاب إلزامي أخده بمقابل مادي، دي المشكلة الحقيقة، إن إنت تحرر المادة العلمية من ايد أستاذ لازم تعطيه تعويض مالي، ولما أقول أي مادة علمية ياخدها الطالب بكلية عملية أو نظرية لازم مادة أن المحتوي العلمي سطرين طب المحاضرات والنماذج ايه”.

وأضاف: “مثلا التكنولوجيا في الإعلام لازم يشوف فيديوهات وصورة لازم عنده مادة استرشادية ولازم يبقي في سؤال ويدخل يعمل بحث عنه، معدش ينفع يبقي في كتاب موجه من ١٠ سنين، طب إذا كانت الجودة تقول ان لازم تستطلع رأي الطالب في المادة العلمية وبناء علي رأيه تطور بها المادة، هل المؤلف الشخصي اللي له رقم إيداع اقدر العب فيه؟ لأ، إذا تحرير المادة العلمية ويبقي المقابل العائد المالي بتاعها ميبقاش تبع حد، حضرتك تألف وتاخد مقابل تدريس ولازم ارفع مرتبات الأساتذة”.