وزير التعليم يكشف: امتحانات الثانوية العامة هذا العام بنفس مواصفات العام الماضي.. و«عصر إن أفاجيء المجتمع والطلبة وأولياء الأمور انتهي»
كشف وزير التعليم الدكتور رضا حجازي، أن نظام امتحانات الثانوية العامة هذا العام مثل العام الماضي تماما بنفس المواصفات، وأنت كطالب مطلوب منك أن تجتهد وتذاكر.
واستطرد وزير التعليم، خلال لقاء في برنامج حديث القاهرة الذي يقدمه الإعلامي خيري رمضان علي قناة القاهرة والناس: “بصوا عصر إن أنا أفاجيء المجتمع وأفاجيء الطلبة وأولياء الأمور دا ولا خالص، لأن دا يستلزم دراسة متأنية وفي مؤتمر وطني كبير هيتعمل علشان نعمل حاجة بخصوص النظم، يعني أنا مكلف المراكز البحثية يشوفوا النظم العالمية للمناهج شكلها ايه، ونظم التقييم العالمية شكلها ايه، ونظم المسارات الخاصة بالطلاب وغيرها، ومش هنعمل حاجة ابدا إلا لما نعمل عليها حوار مجتمعي قوي جدا”.
وحول تطبيق نظام البوكليت علي طلاب الشهادة الإعدادية من عدمه، قال وزير التعليم الدكتور رضا حجازي: “البوكليت طلع في الثانوية العامة ليه؟، علشان موضوع الغش، ورقة واحده تتصور وش وضهر وخلصت، ولما حصل بعض الحالات في المرحلة الإعدادية، أنا هدفي الأساسي كمسئول مش عايز غش ولا تسريب، كل مديرية بقي تعمل الإمتحانات بما يناسب ظروفها، مثلا محافظة زي الوادي الجديد عايزة تعمل بوكليت خلاص اعمل بوكيلت، محافظة أخري زي الدقهلية عايزة تشتغل عادي لكن في آليات لا أريد التحدث عنها الآن تضمن عدم حدوث غش أو تسريب، ولكن مطلوب لكل مديرية تبلغ طلابها بالنظام اللي هييجي الامتحان عليه، وامتحان الإعدادية علي مستوي كل محافظة وليس علي مستوي الجمهورية”.
