مقالات

رحاب الجندي تكتب: الست القوية والبائسة

في يوم 15 يونيو، 2021 | بتوقيت 6:33 م

الست القوية مصممة تنجح وبتتعافي بسرعة، بتعرف تاخد بالها من نفسها، مبتعرفش تعيش دور الضحية، البائسة أوقات كتير بتكون عندها مشاكل أقل.

تفضل تعيط علي حالها وتبص علي اللي حواليها وتندب على حظها.. ماعندهاش طاقة ولا استعداد تساعد نفسها تبقي قوية، مصممة تكمل دور الضحية علي خط العمر!.

خليكي ست قوية إعملي معروف، خليكي بالمعقول، إحزني من غير ما تخلي الحزن ياكل فيكي، إبعدي بس ماتهجريش، قربي بس ما تلزقيش، اجتهدي وخليكي طموحة بس ماتسحليش نفسك.

ابسطي نفسك من غير إسراف، انتاخي من فترة لفترة من غير ماتتخلي عن مسؤولياتك، اتغفلي وعدى أخطاء اللي بتحبيهم من غير ما تيجي علي نفسك، عاتبي الغاليين اللي لهم عندك غلوة بس برحمة، ابقي حازمة من غير قسوة، العبي رياضة واهتمي بصحتك، العبي رياضة وكلي اللي انت عاوزاه من غير ما تضري صحتك.

افتكري قولتلك
خليكي بالمعقول..

حبي كمان بالمعقول، خلي الحب والحبيب جزء من حياتك ومن سعادتك ووقت اضطرابك، بس مايبقاش هو كل حاجة، بلاش كل تركيزك يبقي معاه، اجتهدي وانجحي، خليكي بالمعقول، هتلاقي مبقاش حواليكي غير الناس اللي شبهك.